O equipo detrás de 'Coa historia nos pés' componse de catro rapazas de diferentes lugares de Galicia: Almudena Villanueva Castro (Bandeira, Silleda) , Lián Trigo Lombardero (Outeiro de Rei, Lugo) , Lucía Seoane Manteiga (A Coruña) e Uxía Rodríguez Méndez (O Barco de Valdeorras, Ourense), todas nacidas no 2004 e estudantes de 3º de xornalismo na Universidade de Santiago de Compostela (USC). Entre todas fomos as artesás do verbo e da palabra. Tallamos esta reportaxe coa delicadeza coa que unha zoqueira talla a madeira, coa finalidade de darlle unha nova voz ao zoco para que contase a súa propia historia.